Het hete weer

Historische Kring Wederden

“Lekker”, zeg de stadsche juffer dee har hier argens is lozeerd.
Zunne en warmte wol ze hebben, En des noew de meuite weerd.

“Lekker”, zeg den iesverkoper, as e tingelt langs de weg,
want hee weet wel, det de warmte um neet licht ’n windei leg.

“Lekker”, zeg met zon geneugen ook den läppieswinkeleer,
want noew krig e nog slietzaziej in de dunne zommerkleer.

“Lekker”, zegt de kasteleinse, want zee weet, woer ’t good veur is:
mennigene wödt der dan van eer gedrèènkte lekker fris.

Mar nen boer zegt neet van “lekker”, want het geet um noew te noa,
alle daege zunne, en dee oostenweend zoo schroa.

’t Vee hef umtrent neet te vretten, want de weide wast neet an.
Aj de beeste in ’t heuilaaand doo munt, woer mut ’t dan ’t winter an?

Good , dat ’t neet in mèènschenhaand lig, wat veur weer of ’t wödden zal,
want dan haj nen water, wind en zunne oorlog oaveral.

Johanna van Buren
Geschreven in 1939